"IKAW ABOG UG SA ABOG IKAW MOBALIK"

ASH WEDNESDAY

(Homily given at Davao City Jail, Ma-a)

“Hinumdomi, tawo, nga ikaw abog ug sa abog ikaw mobalik.”

Kini ang mga pulong sa atong Simbahan nga atong madungog sa Miyerkoles sa Badlis. Sa atong pagdawat sa abo nga ibadlis sa atong agtang, kita gipahinumdoman karong adlawa nga kita isip binuhat pinaagi sa yuta, ug tungod sa sala, mobalik kita sa abog, sa yuta.

Diha sa Genesis, si Adan ug si Eva nakasala batok sa Dios. Ug kita, isip mga kaliwat ni Adan ug Eva, nakaambit niining sala, ang sala nga panulondon.

Akong mahinumdoman, kadtong naa pa ko sa kolehiyo, nag-tan-aw-tan-aw ko sa mga pictures sa internet. Ug didto nakita nako ang patayng lawas, pinaagi sa slideshow sa mga pictures, nga sa hinayhinay natun-as. Gikan sa unang adlaw, ikaduhang adlaw, ikatlo... hangtud sa usa ka semana.

Ang pagkaagnas sa lawas sa tawo sama niini mahitabo sa bisan kinsa sa atoa. Kini ang kamatuoran nga kita mobalik gayud sa abog.

Anaay lain pang mga pulong nga atong madungog diha sa Badlis: “Paghinulsol ug tuo sa Ebanghelyo.” Kini ang mga pulong nga gikan gayud kang Hesus sa iyang pagsugod sa iyang misyon.

Kining mga pulong ni Hesus maoy tawag ug hagit alang kanato sa pagbalik kaniya, sa paghinulsol ug sa pagbag-o sa atong kaugalingon.

Kita, isip tawhanon, makasasala. Huyang. Apan ang Ginoo anaay plano alang sa atong kinabuhi. Siya kanunay nagtawag kanato sa pagbalik kaniya. Kini ang kinahanglan nato nga timan-an sa kanunay, nga ang Ginoo nahigugma pag-ayo kanato. Hinigugma kita.

Tataw kaayo ang iyangdakong gugma ug kalooy didhi sa atong unang poagbasa gikansa basahon ni Propeta Joel. Balik sa Ginoo nga inyong Dios, kay maloloy-on siya kaayo ug mapailobon. Andam siya sa pagpasaylo. Gitawag kita sa Ginoo: “Balik kamo kanako...”

Diha sa atong salmo karon, mao unta kini ang hilak ug agulo sa atong kasingkasing: “Kaloy-I ako, ODios, diha sa imong kalooy.” Gitawag kita sa matuod nga paghinulsol.

Diha sa atong paghinulsol, gihatagan kita sa Ginoo ug giya. Niining panahon sa Kwaresma gitawag kita sa pagbuhat ug maayo ngadto sa uban, pag-ampo nga matinud-anon, ug pagpuasa. Kini atong buhaton nga tinuoray ug gikan gayud sa atong kasingkasing.

Gihatagan kita sa Grasya sa Ginoo. Kinahanglan lamang nga dili nato usikan. Diha sa atong kasingkasing, sa atong konsensya, anaa ang Ginoo. Kinahanglan lang nato nga maminaw kaniya. Si San Pablo naghangyo pinaagi sa iyang sulat ngadto sa mga Corinto nga makig-uli kita sa Dios.

Si Kristo nakig-ambit kanato sa atong pagkatawo, aron kita mahiusa kaniya ug makaambit sa kinabuhi nga tunhay. Namatay siya sama nato, apan mabanhaw kita uban niya.

Karong adlawa, sa pagsugod nato sa Kwaresma, gipahinumduman kita, pinaagi sa abo, sa atong kamatayon. Ang kamatayon ngakabayaran sa atong mga sala. Mobalik kita sa abo, apan diha sa atong paghinulsol, ug pagtuo sa Ebanghelyo, makaambit kita sa kinabuhi ni Kristo – nga namatay, nabanhaw ug mobalik.

Kita abog --- paghinulsol, ug tuo sa Ebanghelyo!